చలువ చల్లని చూపే నీది మీనాక్షి
కలువ ఆసిని నువ్వే మా గీర్వాణి
నిలువ భక్తీ నీ మీదే మా కామాక్షి
పిలువ కటాక్షించే నువ్వే మా శర్వాణి

పరిక్షించకే అల్పులము మము వైష్ణవి
రక్షింపవే దీనులము మము శాంకరి
క్షణ నిరీక్షణ కాక కావు మము వాసవి
శిక్షించకే మూఢులము మము హ్రీంకరి

స్వర్గతుల్యమే మీ నవ్యగృహము

హరిచాపమే తోరణమాయే మిద్దె మింట

కల్పవ్రిక్షమే తులసిమోక్కాయే మీఇంట

కామధేనువే కాలుమోపును మీ గడపంట

అమృతపాకమే వండివడ్డింతురు మీ వంటింట

స్వర్గతుల్యమే మీ నవ్యగృహము ఆదైవం అంట

కలువపూల యోగివాడు సిరులుగల్గిన భోగివాడు

కలువపూల యోగివాడు సిరులుగల్గిన భోగివాడు
హరునిసైతం మాయజేసె వేయిపేర్ల మాయలోడు

రథమునైన తోలేవాడు కోతిమూకల గారడోడు
కత్తిసైతం మర్చిపోయి మొసలిజంపిన మావటోడు

బలినితోక్కిన పొట్టివాడు విల్లుపట్టిన పొడగరాడు
వెన్నజున్నులు దొంగలించే ద్వారకేలే రాజువాడు

కొండనైన మోసేటోడు గోడలోన దాగినోడు
రాయినైనా మనిషి చేసిన శిల్పివాడు

సతతము వర్ధిల్లు సాయినాధవరసుత

మా నాన్నగారి పుట్టిన రోజు సందర్భంగా నేను రాసిన పద్యం

శకుంతలసుత ధీ బలోధిత
అర్థశాస్త్ర వేద్య అన్య పాండిత్యవేత్త
సర్వజనహితకర్మన్యోనుత
బాధ్యతాయుత సర్వోత్తమపిత
త్వమసుత హితరక్షన్విత
సతతము వర్ధిల్లు సాయినాధవరసుత

తెలుగుతల్లి వారసులకు వందనం

అదిల నుంచి హంపి దాక

కృష్ణరాయని కీర్తి చుసిన

శబరి నుంచి పెన్న దాక
ఆంద్రకేసరి పఠిమ గాంచిన

అరుకు నుంచి కడప దాక

ఎన్టిఆరునీ ప్రతిభ ఎరిగిన

తెలుగు తల్లి వారసులకు
గౌరవప్రియ వందనం

ఆవకాయ రుచిని మరిగిన
సక్కినాలు పంట కొరికిన

ఉలవచారు జుర్రు కున్నిన
మినపసున్ని నోట మింగిన

ముద్దపప్పు అంతు చుసిన
గుత్తి వంకాయి ఆరగించిన

తెలుగు తల్లి వారసులకు
షడ్రుచోపేత వందనం

ఏడు కొండలు ఎదురుచూసిన
తాళ్ళపాక కృతులు విన్న

రామ భద్రుని నిలువరించిన
రామదాసుని పదము విన్న

నాల్గు జాతులు ముగ్డులైన

త్యాగరాయ కృతులు విన్న

తెలుగుతల్లి వారసులకు

సరిగమప్రియ వందనం

ఆదికావ్యమును పలకరించిన
ననయభట్టు రచన చదివిన

సరసరసమును వోలకబోసిన
సార్వభౌముని చాటు చదివిన

అల్లికల లో ఆరితేరిన
అల్లసాని కవిత చదివిన


తెలుగుతల్లి వారసులకు

సాహితిప్రియ వందనం

నేర్వవోయి తెలుగు తెలుగు !

తేట తేట పాల నురుగు,
అక్షరాల విరుల వాగు
చుక్కలమ్మ కాంతి వెలుగు,
కన్న తల్లి తెలుగు తెలుగు !

జాలమంతా తెలుగు పెరుగు
తెలుగుబ్లాగు అయ్యే మెరుగు
గోడలన్నీ విరుగు విరుగు
కొత్తబ్లాగు తెలుగు తెలుగు !

పొరుగు భాష కొంత తరుగు
సొంత భాష నేర్చ మెరుగు
గంగిగోవు పాల పొదుగు
అమ్మ భాష తెలుగు తెలుగు !

సిగ్గు పడకు, వాడు తెలుగు
నేర్పు నువ్వు కొంత తెలుగు
తెలుగు భాష జాతి సొబగు
నేర్వవోయి తెలుగు తెలుగు !

భరతమాత అష్టకం

త్రివర్ణకేతు ధారిణి సుధారస సుభాషిణి
మయూరవ్యాఘ్ర పోషిణి నమోస్తుతే నమోస్తుతే

సింధుకృష్ణ మాలికే మగధచోళ నాయికే
కతకభరత నర్తికే నమోస్తుతే నమోస్తుతే

క్షమోధరిక శాసిని మహావైవిధ్య రూపిణి
సమస్తజాతి మాత్రుకే నమోస్తుతే నమోస్తుతే

వేదాంగవెద్య సాక్షిక గీతోపనిషద్య కృత్తిక
బ్రహ్మండతత్వ మూలిక నమోస్తుతే నమోస్తుతే

హిమమ్ముకుట ధారిణి సేతుపీఠ స్తారిణి
భరతవర్ష ధారుణి నమోస్తుతే నమోస్తుతే


నానాధర్మాణి స్థాపిక చతుర్ధిగ్ద వ్యాపిక
అనేకభాషా సూత్రిక నమోస్తుతే నమోస్తుతే

సప్తసింధు వాహిని సప్తనాద గాయిణి
ఆదితాళ మూర్ధని నమోస్తుతే నమోస్తుతే


ధర్మచక్ర భూషికే కర్మరాజ్య పాలికే
నమోస్తు భరత మాతరం నమోస్తు భరత మాతరం